Samux Rayon İcra Hakimiyyəti başçısının 2018-ci ilin birinci yarısının sosial-iqtisadi inkişafının yekunlarına və qarşıda duran vəzifələrə dair hesabat yığıncağı keçirilmişdir.
Azərbaycan Respublikasının Prezidenti cənab İlham Əliyevin rəhbərliyi ilə həyata keçirilən islahatlar Azərbaycan iqtisadiyyatının şaxələndirilməsinə, iqtisadiyyatın strukturunda keyfiyyət dəyişikliklərinin baş verməsinə, sənayeləşmənin geniş vüsət almasına, iqtisadi sabitliyə öz töhfəsini verməkdədir. 2018-ci ilin birinci yarısında da ölkəmizin sosial-iqtisadi inkişafı davam edib, iqtisadi siyasətin prioritet istiqamətləri olan makroiqtisadi sabitliyin möhkəmləndirilməsi, qeyri-neft sektorunun inkişafının sürətləndirilməsi, regionların tarazlı inkişafı, əlverişli biznes və investisiya mühitinin formalaşdırılması və digər sahələrdə əhəmiyyətli irəliləyişlərə nail olunmuşdur.
Azərbaycan Respublikasının Prezidenti cənab İlham Əliyevin sədrliyi ilə keçirilən Nazirlər Kabinetinin 2018-ci ilin birinci yarısının yekunlarına və qarşıda duran vəzifələrə həsr olunmuş iclasında bu haqda ətraflı danışılmış və ölkə başçısı proqram xarakterli çıxışlarında daxili-xarici siyasətdə, iqtisadiyyatda və digər sahələrdəki vəziyyəti geniş təhlil etmiş, qarşıda duran vəzifələri müəyyənləşdirmişdir.
İclasda qeyd edilmişdir ki, aprel ayında keçirilən prezident seçkiləri bir daha onu göstərdi ki, Azərbaycan xalqı cənab Prezidentə çox böyük dəstək verir. Seçkilərdə qazanılmış inamlı qələbə onu göstərir ki, son 15 il ərzində görülmüş işlər Azərbaycan xalqı tərəfindən çox yüksək qiymətləndirilir. Bu seçkilərlə Azərbaycan bütün dünyaya bir daha sübut etdi ki, müasir, demokratik ölkədir. O ölkədir ki, burada bütün azadlıqlar təmin edilir. Xalq cənab İlham Əliyev siyasətinə alternativ siyasət görmür və bundan sonra da xalq ölkə başçısının siyasətini dəstəkləyəcəkdir.
Hazırkı siyasət xalqın maraqlarını təmin edən siyasətdir, müstəqillik siyasətidir, inkişaf siyasətidir. Məhz bu siyasət nəticəsində Azərbaycan son 15 il ərzində çox böyük və şərəfli yol keçmişdir, bütün göstəricilərə görə dünya miqyasında çox yüksək yerlərdədir.
Aparılmış uğurlu xarici siyasət nəticəsində Azərbaycan, demək olar ki, bütün ölkələrlə, bütün güc mərkəzləri ilə çox səmərəli, işgüzar, bərabərhüquqlu münasibətlər qura bilmişdir. Bu münasibətlər qarşılıqlı inam, hörmət, bir-birinin işinə qarışmamaq prinsipləri əsasında qurulur.
Azərbaycandan tamamilə fərqli olaraq 20 il ərzində kriminal, korrupsioner, qaniçən, oğru, yalançı hakimiyyət Ermənistanda tam iflasa uğradı. Bunu erməni xalqı təsdiqlədi. Bu gün biabırcasına hakimiyyətdən qovulmuş Sarkisyan rejimi, əslində, Ermənistanın dövlətçiliyinin iflasıdır. Bu rejimin çökməsində Azərbaycanında özünə məxsus rolu vardır. Ölkə rəhbərliyinin apardığı düşünülmüş siyasət nəticəsində Ermənistan onlara gəlir gətirə biləcək bütün layihələrdən məhrum edildi. Onlara qarşı təcrid siyasəti uğurla aparılır və bu siyasət ərazi bütövlüyümüz tam təmin olunana qədər davam edəcəkdir.
2016-cı ilin Aprel döyüşləri və qazandığımız böyük qələbə, 2018-ci ilin mayında Naxçıvan əməliyyatı və minlərlə hektar torpağın işğalçılardan azad edilməsi - bütün bunlar Azərbaycan Ordusunun döyüş qabiliyyətini göstərir. Qarşı tərəf bunu bilir və onların bu gün beynəlxalq təşkilatlara müraciəti, əslində, öz məğlubiyyətlərinin etirafıdır.
Ölkəmizin inkişafının təməlində ölkə başçısı tərəfindən yürüdülən həm düşünülmüş siyasət, həm güclü iradə, eyni zamanda, güclü iqtisadiyyat dayanır. Azərbaycanda güclü iqtisadiyyat qurulub, bu gün heç kimdən asılı deyilik, özümüz öz taleyimizin sahibiyik və iqtisadi sahədə böyük uğurlar əldə etmişik. Son 15 ilin göstəriciləri bunu əyani sübut edir. İqtisadi baxımdan 15 il ərzində Azərbaycan qədər inkişaf edən ikinci dövlət yoxdur.
Cari ilin altı ay ərzində ümumi daxili məhsul 1,3 faiz, qeyri-neft sektoru 2 faiz, qeyri-neft sənayesi 8,8 faiz, kənd təsərrüfatı 7,6 faiz, bitkiçilik 14 faiz, əhalinin pul gəlirləri 9,3 faiz, xarici ticarət dövriyyəsi 35 faiz, ixrac 34 faiz, o cümlədən qeyri-neft ixracı 20 faiz artmışdır. İqtisadiyyatın və sosial sahələrin inkişafına bütün maliyyə mənbələri hesabına 6,3 milyard manat əsas kapitala investisiya yönəldilib. Əsas kapitala yönəldilən vəsaitlər qeyri-neft sektoru üzrə 22 faiz, qeyri-neft sənayesi üzrə isə 69 faiz artıb.
Orta aylıq əməkhaqqı illik müqayisədə 4 faiz yüksəlib, dövlət büdcəsindən maliyyələşdirilən təşkilatlarda çalışanların əməkhaqqı, həmçinin pensiya və müavinətlər artmışdır.
67 min yeni iş yeri yaradılmışdır ki, onun da 58 mini daimi iş yerləridir. Ölkə iqtisadiyyatına 6 milyard dollar sərmayə qoyulmuşdur. İnflyasiya cəmi 3 faizdir. Xarici ticarətin müsbət saldosu 4,2 milyard dollardır. Ölkəmizin valyuta ehtiyatları 44,3 milyard dollar təşkil edir.
İlin birinci yarsında Azərbaycanın demək olar ki, bütün şəhər və rayonları tikinti meydançasına çevrilmişdir. Həm dövlət kapital qoyuluşu, həm özəl sektor tərəfindən qoyulan investisiyalar inşaat sektorunun inkişafına böyük təkan vermişdir.
Sosial infrastruktur sürətlə inkişaf edir. Cənab Prezident qeyd etmişdir ki, qazlaşdırma bu ilin sonuna qədər 95 faizə çatacaq, plana görə 2 min kilometr yeni avtomobil yolu salınmalıdır və minimum 600 kənd yeni yollarla təmin edilməlidir. 100 min hektar yeni torpaqlara su veriləcək və 300 subartezian quyusunun qazılması nəzərdə tutulur. Bu il 137 modul tipli məktəb tikilib istifadəyə verilməlidir. Bakı şəhərində 12 məktəb əsaslı təmir edilməlidir. Bu il 160 milyon manat dəyərində 5 mindən çox kənd təsərrüfatı texnikası alınacaq.
Bu gün ölkədə Bakı-Supsa, Bakı-Tbilisi-Ceyhan, Bakı-Tbilisi-Ərzurum, TANAP kimi layihələrimiz var. TAP layihəsi icra edilir. Bunlar Azərbaycanın xoş gələcəyindən xəbər verir.
Dövlət başçısı yekun nitqində görülən işlərlə yanaşı Nazirlər Kabineti qarşısında yeni vəzifələr müəyyənləşdirdi:
- islahatlar daha da dərinləşdirilməlidir;
- iqtisadi və maliyyə sektorlarında maksimum şəffaflıq təmin edilməlidir;
- vergi və gömrük orqanları dünyanın inkişaf etmiş ölkələrinin səviyyəsinə qalxmalıdır;
- sosial təminat sahəsində şəffaflıq və ədalət tam bərqərar olmalıdır;
- azərbaycan qeyri-formal məşğulluğa qarşı çox ciddi tədbirlər görən ölkəyə çevrilməlidir;
- dövlət xərclərinə nəzarət gücləndirilməlidir;
- korrupsiyaya və rüşvətxorluğa qarşı mübarizə daha ciddi aparılmalıdır.
Davos Dünya İqtisadi Forumunun hesablamalarına görə, Azərbaycan dünya miqyasında rəqabətqabiliyyətliliyinə görə 35-ci yerdədir. Yol infrastrukturunun inkişafına görə 36-cı, inkişaf edən ölkələr arasında inklüziv inkişaf indeksinə görə 3-cü yerdədir. Ümumi infrastrukturun inkişafına görə dünya miqyasında 26-cı, xalqın iqtidara dəstəyinə görə dünya miqyasında 20-ci yerdədir. Bu rəqəmlər əyani şəkildə göstərir ki, Azərbaycan hansı böyük uğurlara imza atıb.
Əvvəlki illər kimi 2018-ci il də rayonumuz üçün uğurlu il hesab olunur və cari ilin altı ayının yekunları bunu deməyə əsas verir ki, rayon iqtisadiyyatının bütün sahələrində artım dinamikası davam etmişdir. Eyni zamanda rayonda tikinti-quruculuq və abadlıq sahəsində işlər daha da sürətləndirilmişdir.
Cari ilin birinci yarısının sosial-iqtisadi inkişafının əsas iqtisadi göstəricilərinə nəzər salsaq buna əmin ola bilərik. Belə ki, hesabat dövründə rayon üzrə ümumi məhsul buraxılışının həcmi 75,2 milyon manat olmuşdur ki, bu da ötən ilin müvafiq dövründəkindən (62,5 mln.manat) 20,2 faiz çoxdur. Cari ilin 6 ayında ötən ilin müvafiq dövri ilə müqayisədə sənaye məhsulunun həcmi 34,8 faiz artaraq 4,4 milyon manat, kənd təsərrüfatı məhsullarının həcmi 25,7 faiz artaraq 40,6 milyon manat, tikinti 40,2 faiz artaraq 9,4 milyon manat təşkil etmişdir. Hesabat dövründə pərakəndə əmtəə dövriyyəsi 3,7 faiz, əsas kapitala yönəldilən investisiya 37,5 faiz artmışdır.
Azərbaycan Respublikasının Prezidenti cənab İlham Əliyevin 27 fevral tarixli 18 saylı Fərmanı ilə təsdiq edilmiş “Azərbaycan Respublikası regionlarının 2014-2018-ci illərdə sosial-iqtisadi inkişafı Dövlət Proqramı”-nın yerinə yetirilməsi istiqamətində rayonda görülən işlər davam etdirilmişdir. Belə ki, Burunqovaq kəndində inşa edilmiş modul tipli məktəb binasının tikintisi başa çatdırılaraq istifadəyə verilmişdir.
Şəhərin Heydər Əliyev və Kolayır prospektlərində, Nəriman Nərimanov, Elçin Məmmədov, Arif Nəbiyev küçələrində, Kür yolunda aparılan yenidənqurma və bərpa işləri başa çatdırılmışdır. Yararsız bort daşları və tavalar sökülərək yenilənmiş, keyfiyyətsiz hasarlar yenidən hörülmüş, suvanma və rəngləmə işləri həyata keçirilmişdir. Heydər Əliyev pprospektində və Arif Nəbiyev küçəsində hasarların “Aqlay” tava daşları ilə üzlənməsi və bərpa işləri aparılmışdır. Kolayır prospektində 54, Elçin Məmmədov küçəsində 27, Kür küçəsində 27, Nəriman Nərimanov küçəsində 8 ədəd olmaqla,ümumilikdə 116 ədəd, eyni zamanda Qarayeri qəsəbəsində 14 ədəd müasir işıqlandırıcı quraşdırılmış və abadlıq işləri həyata keçirilmişdir.
Cari ilin iyun ayında Qarayeri qəsəbəsində ümumi sahəsi 1,5 hektar olan istirahət parkında təmir-bərpa işlərinə başlanmışdır. Parkın ətrafında hasarlama işləri başa çatdırılmış, gəzinti yollarına üzlük daşların düzülməsinə başlanmışdır. Hazırda işlər davam etdirilir.
Rayonun Çobanabdallı kəndində yataqxana tipli, ikimərtəbəli bir bloklu, hər biri 16 mənzilli, ümumi sahəsi 2020 kv.m. olan iki binada blokların təmiri, qapı və pəncərələrin quraşdırılması işləri tam başa çatdırılmış, hər iki binada son tamamlama işləri həyata keçirilir. İstixana kəndində ikimərtəbəli, iki bloklu, hər biri 12 mənzilli, sahələri 1445 kv.m olan iki binada isə təmir-bərpa işlərinə başlanmış, hazırda işlər davam etdirilir.
Rayonun uzunluğu 15,3 km olan İnstitut - Çobanabdallı - Lək - Sarıqaya və uzunluğu 12,7 km olan Yenikənd-Köbər-Qaraağaclı kəndlərarası avtomobil yollarında yenidənqurma və bərpa işlərinə başlanmışdır. Həmin yollarda işlər əsasən başa çatdırılmış, yeni asfalt örtüyü salınmışdır. Hazırda Yenikənd-Köbər-Qaraağaclı yolu üzərində olan körpünün tikintisi üzrə işlər aparılır.
Azərbaycan kənd investisiya layihəsi çərçivəsində rayonun Qaraağaclı qəsəbəsində, Yenikənd, Köbər, Çobanabdallı, Qarabağlar və Sarıqaya kədlərində daxili yolların təmir-bərpa işlərinə başlamaq üçün sənədləşmə işləri başa çatmışdır. Yaxın vaxtlarda işlərə start veriləcəkdir.
6 ay ərzində bütün istiqamətlərdə yolların çiyin hissələri avtoqreyderlə plana salınmış, torpaq yatağı maillikləri kol-kosdan təmizlənmişdir. Gəncə - Samux, Samux - Lək, Samux- İnstitut, Qaraağaclı-Burunqovaq, Samux-Yenikənd-Poylu avtomobil yollarında və çiyin hissələrində 126 min m2 sahədə çınqıl materialı ilə təmir işləri aparılaraq 22,3 min m3 həcmində çınqıl materialı işlədilmişdir.
Azərbaycan Respublikasının Prezidenti cənab İlham Əliyevin ölkədə kənd təsərrüfatının inkişaf etdirilməsi, ərzaq təhlükəsizliyinin təmin edilməsi məqsədilə verdiyi müvafiq tapşırığa əsasən rayon ərazisində iri təsərrüfatların yaradılması istiqamətində işlər davam etdirilmişdir. Hazırda rayonda “AQRO DAİRY” Məhdud Məsuliyyətli Cəmiyyət, “Boz dağ” heyvandarlıq kompleksi, “Ulduz 2011” MMC, “Qarabağ Region MKT” MMC , “Vest Milk” MMC, Murovdağ Kəndli fermer təsərrüfatı, Hevandarlıq və Yemçilik müəssisəsi, “Region Aqro” MMC kimi iri sahibkar təsərrüfatları fəaliyyət göstərir. Eyni zamanda rayonda 155 müasir istixana fəaliyyət göstərir ki, onların da ümumi sahəsi 75,0 hektar təşkil edir. Bu istixanalarda il ərzində 8000 tondan cox faraş tərəvəz - pamidor, xiyar yetişdirilir. Bu məhsulların cox hissəsi MDB ölkələrinə ixrac olunur.
İlin əvvəlində respublikamızın hər yerində olduğu kimi, rayonumuzda da əhalinin məşğulluğu sahəsində yaranmış problemin aradan qaldırılması məqsədi ilə ölkə başçısının tapşırığı əsasında yeni iş yerlərinin yaradılması və ictimai işlərin təşkili istiqamətində tədbirlər həyata keçirilmişdir. Belə ki, 6 ay ərzində 165-i daimi olmaqla 377 yeni iş yeri yaradılmışdır. Yaradılmış yeni iş yerlərindən 12-si Sahibkarlığa Kömək Milli Fondu tərəfindən rayon sahibkarlarına 11 layihə üzrə verdiyi 111,0 min manat güzəştli kreditin hesabınadır.
Bununla bərabər işaxtaran vətəndaşlar arasında özünəməşğulluq proqramının həyata keçirilməsinə başlanmışdır. Bu proqrama 59 nəfər cəlb edilmiş və Beynəlxalq Əmək Təşkilatının təlimlərinə qatılmış və bir aylıq təlimlər başa çatmışdır. Onlardan 1-ci qrup üzrə 24 nəfərinin biznes planlarının müdafiəsi ilə bağlı qiymətləndirmə komissiyasının yekun nəticəsi əldə olunmuşdur. 32 nəfərdən ibarət digər qrupun nəticələri yaxın vaxtlarda məlum olacaqdır. Özünəməşğulluğun əsas istiqamətləri heyvandarlığı və xidmət sahəsini əhatə edir. Qeyd edək ki, ötən il 9 nəfərlə özünəməşğulluq layihəsi üzrə müqavilə bağlanmışdır və hazırda uğurla icra edilir.
Azərbaycan Respublikasının Prezidenti cənab İlham Əliyevin respublikamızda kənd təsərrüfatının inkişaf etdirilməsinin daha da sürətləndirilməsi ilə bağlı tapşırıq və tövsiyələrinin, imzaladığı sərəncamlardan irəli gələn vəzifələrin icrasını təmin etmək məqsədi ilə, iqtisadiyyatının əsasını aqrar sektor təşkil edən rayonumuzda cari ildə sahələrdən yüksək məhsul əldə etmək üçün lazımi tədbirlər həyata keçirilmişdir. 2018-ci ilin məhsulu üçün 10675 hektar sahədə taxıl əkilmişdir ki, onun da 6570 hektarı buğda, 4105 hektarı isə dən üçün arpadır.
Cari ildə 12141 hektar sahədə yazlıq bitkilərin səpini aparılmışdır. Onlardan 526 hektarı şəkər çuğunduru, 2865,5 hektarı dən üçün günəbaxan, 245,0 hektarı kartof, 710 hektarı tərəvəz, 212 hektarı bostan bitkiləri, 359 hektarı qarğıdalı,400 hektarı pambıq və saair bitkiçilik məhsullarıdır.
01.07.2018-ci il tarixinə sahələrdən 31458 ton taxıl məhsulu yığılmışdır ki, bununda 18308 tonu buğda, 13 150 tonu isə arpadır. Məhsuldarlıq 34,5 sent təşkil etmişdir ki, bu da ötən ilin müvafiq dövründəkindən (26,1 sent.) 8,4 sent. və ya 32,2 faiz yüksəkdir.
2018-ci ilin 01 iyul tarixinə iri buynuzlu mal-qaranın sayı 23 659 baş olmuşdur. Bunlardan ana inək və camışların sayı 11886 baş təşkil edir. Qoyun və keçilərin sayı isə 151087 başdır.
6 ayda 2667 ton diri çəkidə ət, 13125 ton süd, 4,4 milyon ədəd yumurta istehsal olunmuşdur. Heyvandarlıq mənsullarının istehsalında da ötən ilin müvafiq dövrü ilə müqayisədə artım vardır.
Kənd təsərrüfatı məhsullarının istehsalında yüksək nəticənin əldə olunmasında əsas şərtlərdən biri əkin sahələrinin suvarma suyu ilə təminatı məsələsidir. Bu sahə daim ölkə başçısının diqqətində saxlanılır. “Əkin sahələrinin suvarma suyu ilə təminatının yaxşılaşdırılmasına və əhalinin içməli suya olan tələbatının ödənilməsinə dair əlavə tədbirlər haqqında” Azərbaycan Respublikası Prezidentinin müvafiq sərəncamları bunun əyani sübutudur. Bu sərəncamlar əsasında rayonumuzda 56 subartezian quyusunun qazılıb istifadəyə verilməsi nəzərdə tutulmuşdur ki, onlardan 46-sı istifadəyə verilmiş, 5 quyu qazılmış, digər 5 subartezian quyusunun qazılması üçün hazırlıq işləri görülür.
Bununla bərabər 2018-ci ilin birinci yarısında 192 ədəd nasos, 27 ədəd elektrik avadanlığı təmir edilmişdir. Torpaqların suvarılması üçün kanallarda 172 min m3 lildən təmizləmə, 40 min m3 sahilbərkitmə işləri görülmüşdür. Kanallarda 17 ədəd hidrotexniki qurğu, 7 ədəd hidropostlar təmir edilmiş, 8400 m2 kol-koslardan təmizləmə işləri aparılmışdır. 6 ay ərzində Gəncə çayında 7 min m3, Qabırrı çayında 6 min m3, Qoşqar çayında 4 min m3 əlavə sahilbərkitmə işləri görülmüşdür.
Rayon əhalisini dayanıqlı elektrik enerjisi ilə təmin etmək üçün 2018-ci ilin birinci yarımilində Samux şəhərinin Kolayır massivində, Sərkar, Ziyadlı və Çobanabdallı kəndlərində elektrik şəbəkəsinin yenidənqurulması işləri həyata keçirilir. Kolayır massivində 10 kv-luq hava xəttinin yenidən qurulması üçün 476 ədəd dayaq basdırılaraq 83,0 km AS70 naqili çəkilmişdir. Kolayır massivində 11, Sarıqaya kəndində 1, Yuxarı Ağasıbəyli kəndində 1, Aşağı Ağasıbəyli kəndində 1 ədəd, ümumilikdə 14 ədəd yeni kompleks transformator məntəqəsi (KTM) quraşdırılmışdır. Eyni zamanda Sərkar kəndinin girişində 1 ədəd 6/10 kv-luq 2,5 MVA gücündə transformator quraşdırılmışdır. Sərkar, Ziyadlı, Çobanabdallı və Burunqovaq kəndlərində ümumilikdə 7,3 km SİP naqil çəkilmişdir. Yeni abonentlərə 325 ədəd sayğac dəsti quraşdırılmışdır.
Əhalinin təbii qazla təminatının yaxşılaşdırılması istiqamətində də müəyyən işlər görülmüşdür. Hal-hazırda rayonun 30 yaşayış məntəqəsində mavi yanacaqdan istifadə olunur ki, bu da rayon üzrə 85,7 faiz yaşayış məntəqəsinin təbii qazla təmin olunması deməkdir. Hesabat dövründə rayonun abonentlərin fasiləsiz və normal təbii qazla təmin olunması məqsədilə müvafiq təmir-bərpa işləri həyata keçirilmişdir. Lək və Hacıalılı kəndlərini təbii qazla təmin edən xəttin dəyişdirilməsi istiqamətində işlər davam etmiş, xəttin 9,0 km hissəsində işlər başa çatmaq üzrədir. 6 ay ərzində 114 yeni abonent təbii qazla təmin edilmiş, 232 qaz sayğacı yenisi ilə əvəz olunmuşdur.
İstehlak olunmuş enerjinin, təbii qazın və içməli suyun dəyərinin vaxtında, tam ödənilməsi üçün rayon İcra Hakimiyyəti başçısı yanında fəaliyyət göstərən qərargah tərəfindən müvafiq işlər aparılmışdır. Əhali tərəfindən istehlak olunmuş elektrik enerjisinin dəyərinin 91,51 faizi, təbii qazın dəyərinin 128,6 faizi yığılmışdır.
Bununla bərabər rayon İcra Hakimiyyətində yaradılmış “Qaynar xəttə” daxil olan məlumatlar, səyyar və fərdi qəbullarda edilən müraciətlər göstərir ki, əhalinin elektirik enerjisi və təbii qazla təminatında müəyyən problemlər hələ də mövcuddur. Xidmətlərin rəhbərləri bundan ciddi nəticə çıxarmalı və mövcud nöqsanların aradan qaldırılması üçün təxirəsalınmaz tədbirlər görməlidir.
2018-ci ilin birinci yarısında Samux Rayon İcra Hakimiyyəti başçısı aparatına ümumilikdə 284 ərizə, təklif və şikayət daxil olmuşdur ki, bu da ötən ilin müvafiq dövründəkindən 30 ədəd (314 ədəd) və ya 9,6 faiz azdır. Müraciətlərdən 102-ı (119) yerli sakinlərdən, 182-si (195) isə respublikanın yuxarı təşkilatlarından olmuşdur. Rüb ərzində daxil olmuş ərizələrdə qaldırılan məsələlər müəyyən olunmuş müddətlərdə yerində araşdırılmış, vətəndaşların haqlı tələbləri vaxtında həll edilmişdir. Eyni zamanda rayon İcra Hakimiyyətinin elektron poçtuna, saytına və qaynar xəttə daxil olan müraciətlər təxirəsalınmadan araşdırılmış, nəticəsi barədə vətəndaşlar məlumatlandırılmışdır.
Birinci yarımildə rayon İcra Hakimiyyətinin başçısı tərəfindən rayonun hüquq mühafizə orqanlarının və xidmət təşkilatlarının rəhbərləri ilə birgə həftədə bir dəfə olmaqla rayonun bütün yaşayış məntəqələrində 23 səyyar qəbul-görüş keçirilmişdir. Bu görüşlərdə 69 müraciət edilmişdir. Müraciətlər əsasən yolların təmiri, yeni yaşayış massivlərinin elektrik enerjisi və təbii qazla təminatı, torpaq, suvarma suyu ilə təminat, bağça tikintisi, tibb müəssisələrinin təmiri ilə bağlı olmuşdur. Müraciətlərin 60-ı (86,9 %) icra edilmiş, 9-ü (13,1%) hazırda icradadır.
2018-ci ilin ikinci yarısında qarşımızda yerinə yetiriləsi vacib olan daha böyük vəzifələr durur. Nazirlər Kabinetinin 2018-ci ilin birinci yarısının sosial-iqtisadi inkişafının yekunlarına və qarşıda duran vəzifələrə həsr olunmuş iclasında Azərbaycan Respublikası Prezidenti cənab İlham Əliyevin proqram xarakterli nitqlərində qarşıya qoyduğu vəzifələri yerinə yetirmək üçün bütün imkanlarımızı səfərbər etməliyik:
- Qarşımızda duran ən vacib məsələlərdən birincisi ölkə başçısı tərəfindən kənd təsərrüfatının inkişafına göstərilən diqqət və qayğıya layiqincə cavab vermək, bu imkandan maksimum yararlanaraq rayon iqtsadiyyatının əsasını təşkil edən kənd təsərrüfatı məhsullarının istehsalının genişləndirilməsi;
- Başlanmış işlərin müvəffəqiyyətlə başa çatdırılması;
- Tikinti - quruculuq işlərinin davam etdirilməsi;
- Şəhərin küçələrinin yenidən qurulması və kəndlərarası yolların əsaslı təmiri də əsas hədəflərimizdəndir və bu sahədə müvafiq işlər aparılır;
- Rayonun 14 yaşayış məntəqəsini əhatə edən mərkəzləşdirilmiş içməli su sisteminin çəkilişinə başlanmışdır ki, onuda uğurla başa çatdırmalıyıq;
- Rayonun Sərkar kənd orta məktəbi üçün 650 şagird yerlik, İnstitut qəsəbə tam orta məktəbi üçün 650 şagird yerlik yeni məktəb binalarının, Qarayeri qəsəbə 2 saylı tam orta məktəbi üçün 200 şagird yerlik, Alıuşağı kənd tam orta məktəbi üçün isə 120 şagird yerlik əlavə korpusların tikintisi həyata keçirilməsi əsas vəzifələrdəndir.
Eyni zamanda əhalinin məşğulluğunun təmin olunması üçün yeni istehsal və emal müəssisələrinin yaradılması istiqamətində də işlər görülür.
